7. ທະຊັຄຄະປະຣິຕຕັງ ທະຊັຄຄະສຸຕຕັງ ສັຕຕະມັງ
ເອວັມເມ ສຸຕັງ
ເອກັງ ສະມະຍັງ ພະຄະວາ, ສາວັຕຖິຍັງ ວິຫະຣະຕິ ເຊຕະວະເນ ອະນາຖະປິນດິກັສສະ, ອາຣາເມ ຯ
ຕັຕ໌ຣະໂຂ ພະຄະວາ ພິກຂູ ອາມັນເຕສິ ພິກຂະໂວຕິ ຯ
ພະທັນເຕຕິ ເຕ ພິກຂຸ ພະຄະວະໂຕ ປັຈຈັສໂສສຸງ ຯ
ພະຄະວາ ເອຕະທະໂວ ຈະ.
ພູຕະປຸພພັງ ພິກຂະເວ ສັກໂກ ເທວາສຸຣະສັງຄາໂມ ສະມຸປັພ໌ຍຸລ໌ໂຫ ອະໂຫສິ ຯ
ອະຖະໂຂ ພິກຂະເວ ສັກໂກ ເທວານະມິນໂທ ເທເວ ຕາວະຕິງເສ ອາມັນເຕສິ,
ສະເຈ ມາຣິສາ ເທວານັງ ສັງຄາມະຄະຕານັງ ອຸປປັຊເຊຍຍະ ພະຍັງ ວາ ສັມພິຕັຕຕັງ ວາ ໂລມະຫັງໂສ ວາ,
ມະເມວະ ຕັສ໌ມິງ ສະມະເຍ ທະຊັຄຄັງ ອຸລໂລເກຍຍາຖະ,
ມະມັງ ຫິ ໂວ ທະຊັຄຄັງ ອຸລໂລເກຍຍະຕັງ,
ຍັມພະວິສສະຕິ ພະຍັງ ວາ ສັມພິຕັຕຕັງ ວາ ໂລມະຫັງໂສ ວາ,
ໂສ ປະຫິຍຍິສສະຕິ.
ໂນ ເຈ ເມ ທະຊັຄຄັງ ອຸລໂລເກຍຍາຖະ ຯ
ອະຖະ ປະຊາປະຕິສສະ ເທວະຣາຊັສສະ ທະຊັຄຄັງ ອຸລໂລເກຍຍາຖະ,
ປະຊາປະຕິສສະ ຫິ ໂວ ເທວະຣາຊັສສະ ທະຊັຄຄັງ ອຸລໂລກະຍະຕັງ,
ຍັມພະວິສສະຕິ ພະຍັງ ວາ ສັມພິຕັຕຕັງ ວາ ໂລມະຫັງໂສ ວາ,
ໂສ ປະຫິຍຍິສສະຕິ.
ໂນ ເຈ ປະຊາປະຕິສສະ ເທວະຣາຊັສສະ ທະຊັຄຄັງ ອຸລໂລເກຍຍາຖະ ຯ
ອະຖະ ວະຣຸນັສສະ ເທວະຣາຊັສສະ ທະຊັຄຄັງ ອຸລໂລເກຍຍາຖະ,
ວະຣຸນັສສະ ຫິ ໂວ ເທວະຣາຊັສສະ ທະຊັຄຄັງ ອຸລໂລກະຍະຕັງ,
ຍັມພະວິສສະຕິ ພະຍັງ ວາ ສັມພິຕັຕຕັງ ວາ ໂລມະຫັງໂສ ວາ,
ໂສ ປະຫິຍຍິສສະຕິ.
ໂນ ເຈ ວະຣຸນັສສະ ເທວະຣາຊັສສະ ທະຊັຄຄັງ ອຸລໂລເກຍຍາຖະ ຯ
ອະຖະ ອີສານັສສະ ເທວະຣາຊັສສະ ທະຊັຄຄັງ ອຸລໂລເກຍຍາຖະ,
ອີສານັສສະ ຫິ ໂວ ເທວະຣາຊັສສະ ທະຊັຄຄັງ ອຸລໂລກະຍະຕັງ,
ຍັມພະວິສສະຕິ ພະຍັງ ວາ ສັມພິຕັຕຕັງ ວາ ໂລມະຫັງໂສ ວາ.
ໂສ ປະຫິຍຍິສສະຕິ ຯ
ຕັງ ໂຂ ປະນະ ພິກຂະເວ ສັກກັສສະ ວາ ເທວານະມິນທັສສະ ທະຊັຄຄັງ ອຸລໂລກະຍະຕັງ,
ປະຊາປະຕິສສະ ວາ ເທວະຣາຊັສສະ ທະຊັຄຄັງ ອຸລໂລກະຍະຕັງ,
ວະຣຸນັສສະ ວາ ເທວະຣາຊັສສະ ທະຊັຄຄັງ ອຸລໂລກະຍະຕັງ,
ອີສານັສສະ ວາ ເທວະຣາຊັສສະ ທະຊັຄຄັງ ອຸລໂລກະຍະຕັງ,
ຍັມພະວິສສະຕິ ພະຍັງ ວາ ສັມພິຕັຕຕັງ ວາ ໂລມະຫັງ ໂສ ວາ,
ໂສ ປະຫິຍເຍຖາປິ ໂນປິ ປະຫິຍເຍຖະ, ຕັງ ກິສສະ ເຫຕຸ,
ສັກໂກຫິ ພິກຂະເວ ເທວານະມິນໂທ ອະວີຕະຣາໂຄ ອະວີຕະໂທໂສ ອະວີຕະໂມໂຫ,
ພິຣຸ ສັມພີ ອຸຕ໌ຣາສີ ປະລາຍີຕິ ຯ
ອະຫັນຈະ ໂຂ ພິກຂະເວ ເອວັງ ວະທາມິ,
ສະເຈ ຕຸມຫາກັງ ພັກຂະເວ ອະຣັນຍະຄະຕານັງ ວາ ຣຸກຂະມູລະຄະຕານັງ ວາ ສູນຍາຄາຣະຄະຕານັງ ວາ,
ອຸປປັຊເຊຍຍະ ພະຍັງ ວາ ສັມພິຕັຕຕິງ ວາ ໂລມະຫັງໂສ ວາ,
ມະເມວະ ຕັສ໌ມິງ ສະມະເຍ ອະນຸສສະເຣຍຍາຖະ ຯ
ອິຕິປິ ໂສ ພະຄະວາ ອະຣະຫັງ ສັມມາສັມພຸທໂທ.
ວິຊຊາຈະຣະນະ ສັມປັນໂນ ສຸຄະໂຕ ໂລກະວິທູ,
ອະນຸຕຕະໂຣ ປຸຣິສະທັມມະ ສາຣະຖີ ສັຕຖາ ເທວະ ມະນຸສສານັງ ພຸທໂທ ພະຄະວາຕິ ຯ
ມະມັງ ຫິ ໂວ ພິກຂະເວ ອະນຸສສະຣະຕັງ,
ຍັມພະວິສສະຕິ ພະຍັງ ວາ ສັມພິຕັຕຕິງ ວາ ໂລ ມະຫັງໂສ ວາ,
ໂສ ປະຫິຍຍັສສະຕິ ໂນ ເຈ ມັງ ອະນຸສສະເຣຍຍາຖະ,
ອະຖະ ທັມມັງ ອະນຸສສະເຣຍຍາຖະ ຯ
ສວາກຂາໂຕ ພະຄະວະຕາ ທັມໂມ, ສັນທິຖຖິໂກ ອະກາລິໂກ ເອຫິປັສສິໂກ,
ໂອປະນະຍິໂກ ປັຈຈັຕຕັງ ເວທິຕັພໂພ ວິນຍູຫິຕິ.
ທັມມັງ ຫິ ພິກຂະເວ ອະນຸສສະຣະຕັງ,
ຍັມພະວິສສະຕິ ພະຍັງ ວາ ສັມພິຕັຕຕິງ ວາ ໂລມະຫັງໂສ ວາ,
ໂສ ປະຫິຍຍັສສະຕິ. ໂນ ເຈ ທັມມັງ ອະນຸສສະເຣຍຍາຖະ,
ອະຖະ ສັງຄັງ ອະນຸສສະເຣຍຍາຖະ ຯ
ສຸປະຕິປັນໂນ ພະຄະວະໂຕ ສາວະກະສັງໂຄ, ອຸຊຸປະຕິປັນໂນ ພະຄະວະໂຕ ສາວະກະສັງໂຄ,
ຍາຍະຕິປັນໂນ ພະຄະວະໂຕ ສາວະກະສັງໂຄ ສາມີຈິປະຕິປັນໂນ ພະຄະວະໂຕ ສາວະກະສັງໂຄ,
ຍະທິທັງ ຈັຕຕາຣິ ປຸຣິສະຍຸຄານິ ອັຕຖະ ປຸຣິສະປຸຄຄະລາ, ເອສະ ພະຄະວະໂຕ ສາວະກະສັງໂຄ, ອາຫຸເນຍໂຍ ປາຫຸເນຍໂຍ ທັກຂິເນຍໂຍ ອັນຊະລີກະຣະນິໂຍ, ອະນຸຕຕະຣັງ ປຸນຍັກເຂຕຕັງ ໂລກັສສາຕິ ຯ
ສັງຄັງ ຫິ ໂວ ພິກຂະເວ ອະນຸສສະຣະຕັງ,
ຍັມພະວິສສະຕິ ພະຍັງ ວາ ສັມພິຕັຕຕັງ ວາ ໂລມະຫັງ ໂສ ວາ,
ໂສ ປະຫິຍຍິສສະຕິ.
ຕັງ ກິສສະ ເຫຕຸ, ຕະຖາຄະໂຕ ຫິ ພິກຂະເວ ອະຣະຫັງ ສັມມາສັມພຸທໂທ,
ວີຕະຣາໂຄ ວີຕະໂທໂສ ວີຕະໂມໂຫ, ອະພິຣຸ ອັຈສັມພີ ອະນຸຕ໌ຣາສີ ອະປະລາຍີຕິ ຯ
ອິທະມະໂວຈະ ພະຄະວາ, ອິທັງ ວັຕ໌ວານະ ສຸຄະໂຕ, ອະຖາປະຣັງ ເອຕະທະໂວຈະ ສັຕຖາ,
ອະຣັນເຍ ຣຸກຂະມູເລ ວາ ສູນຍາຄາເຣ ວະ ພິກຂະໂວ,
ອະນຸສສະເຣຖະ ສັມພຸທທັງ ພະຍັງ ຕຸມຫາກະ ໂນ ສິຍາ,
ໂນ ເຈ ພຸທທັງ ສະເຣຍຍາຖະ ໂລກະເຊຕຖັງ ນະຣາສະພັງ,
ອະຖະ ທັມມັງ ສະເຣຍຍາຖະ ນິຍຍານິກັງ ສຸເທສິຕັງ,
ໂນ ເຈ ທັມມັງ ສະເຣຍຍາຖະ ນິຍຍານິກັງ ສຸເທສິຕັງ,
ອະຖະ ສັງຄັງ ສະເຣຍຍາຖະ ປຸນຍັກເຂຕຕັງ ອະນຸຕຕະຣັງ.
ເອວັມພຸທທັງ ສະຣັນຕານັງ ທັມມັງ ສັງຄັນຈະ ພິກຂະໂວ,
ພະຍັງ ວາ ສັມພິຕັຕຕັງ ວາ ໂລມະຫັງໂສ ນະ ເຫສສະຕີຕິ ຯ
(ທະຊັຄຄະປະຣິຕຕັງ ທະຊັຄຄະສຸຕຕັງ ນິຕຖິຕັງ)
